Junaidi Mukhtar Malacanang – Puisi-puisi

Ngoen nama Tuhan Rabbul Izzati
Lon ci neuk rawi saboh riwayat
Le that manusia neu kheun le Nabi
Keu yatim benci hana di ingat

Yatim piatu bandum di benci
Sapu han dibi beu that meularat
Ta eu si yatim sayang that that hi
Sabe tip pagi mita hareukat

Pileh padee rhet ceuding dalam i
Mita raseuki cukoep meularat
Kadang me sira tuka ngoen padi
Kadang me campli tuka breuh leukat

Beukah siluweu darah bak gaki
Kadang cit teusi tan so peu ubat
Meunan keuh cara mita raseuki
Hana le abi hana so ingat

Laen nibak nyan yang ka terjadi
Oeh mouled Nabi dimana tempat
Ta eu si yatim bandum peureugi
Mita khanduri hana so intat

Saboh suap bu keu jih tan so bri
Siboek di waki mita yang mangat
Ta eu siyatim teuduk rab guci
Han so peuduli sayang cukoep that

Habeh ngoen hidang simpan ta peusi
Meu cep cep bibi siyatim meuhat
Jibeudoh jiwo tan so peuduli
Mata jile i nasib di ingat

Bago yang laen neukheun le Nabi
Akan si faki han di tem ingat
Ureung geumadee mita raseuki
Sapu han dibi beuthat meularat

Han ditem tuloeng meu peng si tali
Keu ureung faki yang ka meularat
Meunyan keuh ureung neukheun le Nabi
Yang ka lon rawi dalam riwayat

Bak uro dudo balasan geu bri
Azeub yang keuji oleh hadharat
Meunyan keuh bangoen yang ka lon rawi
Meuah hai akhi keu ureung surat

Tanyoe meu lakee nibak Ilahi
Azeub bek geubri bandum seulamat
Deungoen beureukat moulid di Nabi
Sabe beu leupi donya akhirat

Lancang Barat, 05 Maret 2010